المابجاغم
المدير العام
عدد المساهمات : 64
نقاط : 164
السٌّمعَة : 3
تاريخ التسجيل : 18/12/2010
 |  موضوع: كرش الغيمة الحامل  الخميس 24 فبراير 2011 - 3:00 | |
| أنا كُتّ صِغَيِّر
قُت لى اخوي
أنا ماشى معاك المدرسة شان اتعلّم
قاللى موافق
سالت فرحتى سيلاً دافق
قمنا مشينا
وكان الشوق اتوطّن فينا
وعامل زيطة
غنى وزغرد فى عينينا
دخلنا المدرسة
واول حصة حضرتها عربى
أنا كُتّ صِغَيِّر
لكن بالفطرة انا حافض أدبى
بدت الحصة
كتب استاذنا تلات سطور
انا كُت مسرور
لكن ما عارف معنى العتمة ومعنى النور
وتوّر واحد شان يقراهن
وواحد يشرح لي معناهن
وفَحَصَت عينو عيون الطلبة
وقال ياشاطر
أبقى مركّز وخلى الغلبة
وقوم شان تعرب
كرش الغيمة الليلة انبعجت
الليلة انبعجت كرش الغيمة
الغيمة كرِشْها الليلة انبعجت
وانا كُتّ صِغَيِّر
إلا احترت فى ها الكلمات
وسرحت مشيت
فارقت الحصة
نعست .. غفيت
وانا لسّه بفكّر
كيف الغيمة كرشها انبعجت
ولو انبعجت
مش كان ولدت واحد صالح؟
يغسل ملح البحر المالح؟
جريت وسألت البرق القبلى
هو كان حابيها
وديمة بشوفو يشاغل فيها
يغمّز ليها
ولما النوم مرة يجافيها
يجى يلوليها
ولما الغمدة تحن وتجيها
يسلِّم ليها فَرَق عينيها
ـــــــــــــــــــــــــــــ
القبلى سمعلى
وجاوب قاللى
لا .. لا أظن
الغيمة الليلة حزينة
وهيّ بتبكى
عشان الأرض الجفّت وبلعت خيرا
ينبلبل طينا
يعود خِدّيرا
وتنبت قمحة
وتطلع زهرة جميلة وسمحة
تلد يقطينه
ودَغَشاً باكر
كلنا فى ايدنا صُرار يحمينا
شَرَاك يا البامية ونحنا نلقّط
وعند التقنت شافع ينطط
والمأجور شوف عرقو ينقِّــط
وداك الناير يسكب يربّط
داير يجهّز عشا غنمايتو
وداير يستِّف من حنتوت
وتَــبَر مخلايتو
وشوف الحُقنة
خدارها يرارى يزيد اعجابنا
نخزّن منّها كم قندول
نحفض تيرابنا
وفجأة صحيت
ــــــــــــــــــــــــــ
بدت الحصة التانية وبرضها عربى
وأصلاً كان هبّوهو الجنبى
قُتْ لَك أعرب
كرش الغيمة الليلة انبعجت
تانى سرحت
نعست غفيت
وانا متذكّر
ديك اللحظة
فى عويناتى سؤال متحكّر
ولسّة بفكّر
وبسأل نفسى
وكُت متيقـِّن
جوة رويسى الحق مندسّى
ويمكن منسى
وبقّت نار
لون الشعر الاسود داب
التفكير ازداد ياداب
وما فكّرت شنو الإعراب
لكن حِرْتَ وزدت اعجاب
الغيمة كرِشْهَا الليلة انبعجت ..كيف؟
بدورلى حقيقة عليها انا أرسى
هل إنبعجت وولدت عسكر؟
شال تمويننا وحصص السُّكر؟
آفة بتفرم فى أحلامنا؟
منجل يقطّع حلو ايامنا؟
شريعة تحلل كلِّ حرامنا؟
سموم بتشوشو لطف انسامنا؟
حُزْن بيَسْرِق فرح اطفالنا؟
موت بيقصِّر لى آجالنا؟
آه يا غيمة
.......انا داير اقولّك
وقبل أقولّها تانى صحيت
ــــــــــــــــــــــــــــــــــــــــ
رنّ الجرس وجرينا رجعنا
وصلنا البيت
نَدَهَت حبوبة تعال آجْنَيْ
أخَتِفْ ماعون واجرى الكنتين
هيل ودالزين
هو أصلاً طيب وراجل امين
ومرضّى زباينو البجى بالحاضر أو بالدين
وايدو سخية لكل مسكين
للشُّفّع دايماً قلبو حنين
وغصباً عننا راجل جارنا
ودارنا هى دارو ودارو هى دارنا
وبحفض جهرنا أو أسرارنا
وفى دقيقتين انا فى الكنتين
عبرولى الزيت
والبن والسكر
وتب ما نسيت
شطة وكبريت
شريتهن وجيت
وشلنا الموية على الديوان
نادينا مُحُمَّد وحاج عِتمان
واتلموا صحون كل النسوان
كسرة رهيفة وسلطة وروب
وهناك تقلية
عصيدة قوية وحارة وبى نعيمية
وفُـوقْهَا سمن غنُّــوم مكبوب
!!..وهناك الحضرى جنس حاجات
فول .. طعمية
وبيض بالطوّة
لحوم مشوية
ولحمة راس
وعيك ياناس
وانا ما همانى
فى الويكاب غرقان لى اضانى
ودخل السر ينكاش متأخّــر
وفى صينيتو
صحنين شطّة وصحن ام تكشو
وفجاة الناس انكبو
عليهو اتلبشو
فطرنا شبعنا
وجبنا الجبنة
قطّر عمى البِكِر .. التانى
ــ أقولّلو كفاك؟
ــ قُتْلَك كُب
واكَبْكِبْ اكَبْكِبْ اكَبْكِبْ
اعيد من تانى عليهو سؤالى
ــ عمّى كفاك؟
ــ قُتْلكْ كُبْ
وبَــرِّك بَرِّك
تالت ورابع
تب اتكيّف
ووشو عرق والهوا ليو جفّف
ذي ماتقول كان خرّف وصيّف
وعمى التانى مدوّر ونسة
ماخلاّلو قصص دوبيت
شى الحاردلو
وشى الفرجونى
وودضحوية
ولما يغلبو
يبرم فى راسو الطاقية
ويَـنْجُــر يَنـْجُــر كم من بيت
همهم ونمّ وغنى اغانى
الساعة حداشر
رجع المدرسة كل اخوانى
وما تنّيت من تانى الرجعة
قعدت اتذكّر ديك الوجعة
مخاض الغيمة
وتانى سرحت
نعست غفيت
وانا لسّة بفكر
وقُتْ فى سري
كان الغيمة كَـرِشْـها انبعجت
سَدْر النيل لسّاهو بيغلى
وضهر السما إتعبّ مواجع
مصيرها الغيمة حتحمل تانى
ومن جوّاي تتطاير امانى
وقبّال تطلع
عُقُب يغشانى
سؤال انسانى
وانا بتذكر خالتى الجنّة
وهي بتبكى تصيح ياهلنا
سألتها خبرك؟
ردت وجانى
الصوت مهزوم
وغلافو بقول جوّاهو هموم
وسمعتها صنّت صنّت صنّت
أوّهت أنّت صاحت
أوووو عمارة البنا
وحكت القصة
عِرِفْتو حُزُنّنا
عِرِفْتَ حُزُنْها
شعرتو ألمنا
شَعَرْت مصادر كل ألمها
انا برضى زعلت
على حلّتنا
وفى أفكارى انا صلت وجلت
وعن الغيمة رجعت سألت
هل حا تولد تانى البلة؟
ويبقى الشيخ واسباب العلة؟
ويبقى الدين بى دقينة وعمة
وجواو فاجر وزولاً ضلّ ؟
ويمسى يردد برفع راسكم
ويصبح لط يملانا مذلة؟
ويهتف يكورك ببنى احلامكم
وفجأة يهدّم كل الحلة؟
ويخطب فينا لموا قواكم
ويرجع يفرتق كل الشلّة
ويحلف انو بيبنى مدارس
وما بتتأخر .. من ديسمبر لاعن مارس
ونادى وروضة
بدل شفخانة اخيرلنا مشفى
كبير ومنظم عادم الفوضى
حَلَف بى الله
انا شفت البلة
بناها عمارة
الطابق الأرضى زريبة بقرو
وقاطوعين وركن لى حمارة
وهَمــَد النور الكم كان ضاوى
فى نص الحلة
ما أصلاً جدّو
زماناً راح ضوّاها خلاوى
وسَكَت الشُّـفَّــع
وبَـدَل اللوح حفظوها غناوى
والشفخانة القلنا تداوى
غِشَتـْها الحُمّى بِـقَت عيّانة
ومن آلامْـَها تَـوِحْ وتلاوى
ولسة ولسة الحلة بتنزف
وهو بيهتف .. وهي بتنزف
وهي بتنزف .. وهو بيهتف
وهي بتنزف
وهي بتنزف
وهي بتنزف
وهو بيهتف
المشروع جاييكى أصُبْرى
حقيقة فرحنا
قلنا يجينا يداوى جرحنا
نشوفو يرارى خدارو قمحنا
نقول من دين وهموم ارتحنا
وفوق المونة جنينا ربحنا
ونبنى البيت نشريهو سمحنا
ووكتين هلّ وجا المشروع
الكان راجنو زمان وزمان
ازداد الهم
للحلة حَكَم سُلطان الجوع
أوْريك القصة
البلة الــوَزِّع
كتب اولادو الحي والمات
وشال لى رقبتو تلات نمرات
وباقى الناس فدان فدان
للضهرو غليد والعندو لسان
والفَـقـْران
قالولو الحنضل والِد فى القيزان
من العيزومة رجع جيعان
واستنى العيد دلقونو ملتّق
ومن مركوب غير شك حفيان
ـــــــــــــــــــــــــــــ
آه ياغيمة
بطنك كبرت
باقى شهر ويجيكِ مخاض
وشان نَـغَـسِلّك دم الحيض
سوينا احواض
ومن بير زمزم عَـبِّـينــاها
وشان ماتشِدِّى قُــواكِ الواهية
ليك ها النخلة .. لقّحناها
وما محتاجة تَهِزِّى جِزِعْها
لأنِّـك انتى فوق فى سماها
لقّطى أكلى .. بطنك تَـرْبَـى
وشان النخلة
وشان بير زمزم
تب ما بنندم
يُولَد شافع .. فوراً يَـحْبَــى
وكل الناس تملاهو مَــحَـبَّـة
ويكبر يكبر
عشق الطين جوّاو يتـْرَبَّى
وما بِـنـْسَاهو جميل النخلة
يخدّر راسا جذورا وسوقا
يجر واسوقا
وينتج يحصد يعمّر سوقا
ويكسى بلادو هدوم العافية
وتصبح آمنة وباردة ودافية
وكل الناس ارواحهم صافية
وفجأة
سِمِعْ حبوبتى تقول آجْنَي
أخَتِف ماعون واجرى الكنتين
هيل ود الزين
صنقرت صحيت
تِت.. تِت .. .. تِيت
قال الرادى الساعة تلاتة
الحلة تــئن
والبلة سِمِن
وفوق الكرشة نزللو دِقـِن
وانا لسّة صِغَيِّــر
إتذكّـرتا حكاوى العم
لورى التنقر وطيبة اهلنا
زماناً راح وعليهو حِزِننـّا
واترحّمت عليهو البنـّا
ربنا يرحم شيخ البنـّا
ربنا يرحم شيخ البنا
ربنا يرحم شيخ البنا
***********
قمرالدين على 12/سبتمبر /2010
| |
|
