شباب حمدت الله {الحمر}
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

شباب حمدت الله {الحمر}

ثقافي ..اجتماعي ...رياضي
 
الرئيسيةالبوابةأحدث الصورالتسجيلدخول

 

 من روائع الشاعر احمد فرح شادول

اذهب الى الأسفل 
2 مشترك
كاتب الموضوعرسالة
المابجاغم
المدير العام
المابجاغم


عدد المساهمات : 64
نقاط : 164
السٌّمعَة : 3
تاريخ التسجيل : 18/12/2010

من روائع الشاعر احمد فرح شادول Empty
مُساهمةموضوع: من روائع الشاعر احمد فرح شادول   من روائع الشاعر احمد فرح شادول I_icon_minitimeالخميس 6 يناير 2011 - 15:50

ما حَأَسْتَجديك تَرْجَع
أو فِ ريدك تانى بَطْمَع ..
ريدنا ما أَوْفيته حَقُّه
كانْ كَمَا الأمثال وأَرْوَع ..

ما زمان
كنت الأمانى
وكنت ساعة الحارة مَرْجَع ..
ولما حضن الكون
يضيق بي
بَلْقَى صَدْرَك مِنُّو أَوْسَع ...
ولما ليل
أشواقى يِسْدِل
انت فى دنياي تسطع ...
وكنت
بَتْوَسَّدْ مشاعرك
وعِنْدَك أحزان عمرى تهجع ...
وكنت
عايش فى عوالم
فوق خيال الناس وأَبْدَع ...

فَجْأَة
وانهارت صِلاتْنا
والبَنِينَا قُصُور تَصَدَّع ...
ولما
حبل الوُدْ نَمِدُّه
كنت دايماً ليهو تقطع ...
ولما كان
الصَدْ خِيارَك
ما حيَبْكِى عليكَ مَدْمَع ...
وعِزَّة القلب
اللِّى رادك
ما حَتَسْمَح ليهو يركع ...
ما تَحَاوِل
تاني ريدنا
يِِسْتَحيل الماضى يرجع !!!! ..







أمانى الدنيا

زيك
أبداً ما لاقانى
وما اتعشمت
تطلى زمانى
وتحفرى اسمك فى وجدانى

خايفة
من الأيام .. و أقدارها
وعاملة
حسابك من ادوارها
سيبى
الدنيا تدور محتارة
ونحن نعيش العمر تهانى

شيلى
سماحك ويلا تعالى
نشد
صهوات الأمل الغالى
نهشم
سور الجفوة العالى
وما فى إنسان فى الدنيا يعانى

جيتى
من الآمال منشرحة
و شايلة
معاكى سنين الفرحة
وانا بتأمل
أخدت السرحة
و اتمنيت ما الدنيا امانى

اتمنيتك تبقى معايا
وطبل
الفرحة يدق جوايا
وبين
السحب الماشة و جاية
القى عيونك تتلقانى
و أتمنيت ما الدنيا أمانى ..









في انتظارك

فى انتظارك
وفى انتظار نغمة هزارك
وطلعة النور … من مزارك
قلّ صبرى … وطال نهارك !!
ياحبابك

في انتظارك
يلاّ كونى
ياما عنك كلمونى
حاسى بيك
في روحى تسرى
فى مسارى وفى سكونى
تملى لي
بالبهجة … كونى
وتنسكب
أفراح شجونى
وينفتح لي سعدى بابك
ياحبابك

فى انتظارك
نفحة هابة
نسمة تضحك للتعابة
حاسى بيك جواية جاية
غيمة بتظلل غلابة
بشرى بالمطرة اللى جاية
تغسل الأسى والكآبة
عن عيون عانت كفاية
صابرة تترقب مآبك
ياحبابك

فى انتظارك
يلا عودى
عامرة بالخير والمحبة
مرة أصدقى يا وعودى
وحققى الأمل المخبا
وبيكى تتفتح ورودى
عن فرح من عمرى غبّ
وليكى أهتف ..
الله جابك الله جابك
ياحبابك !!







الريد بالريد بتربى

مهدود
البال والحيل
مسنود على باب الذكرى..
وعشمان
فى طول الليل
الغطَّى جبال الفكرة ..

تاريخ
الريد الحافل
بى فُرْقَة وقسوة ونَكْبَة ..
خَلِّينا
نعيدها صياغته
ويِتْهَنُّوا الكانوا أحِبَّة ..

ياخايف
سَطْوَة ريدك
الخوف ما دَسَّ محبة ..
بادِرْ
بالشوق العندك
الريد بالريد بِتْرَبَّى

قالوا
الايام بِتْغَيِّرْ
فيك ما بْتِتْبَدَّل شَعْرَة ..
رغم
السنوات المَرَّتْ
نفس الاشراق والنفرة ..

استبشر قلبى
و أَمَّلْ
فى فرحة بِتَشْرِقْ بُكْرة ..
وقال انت
الدنيا الحلوة
الجاى وماضى الذكرى ..

عجلات الزمن
الدايرة
ما وِقْفَتْ لى مشجون ..
عُمْرُه
التاريخ ما اتْوَقَّف
يِسْتَنَّى علاج محزون ..

يلاكَ
نَسَايْرَ الفَرْحة
ونِتْهَنَّى .. كفانا ظنون ..
العمر الباقى
قِصَيَّرْ
مُمْكِنْ نَمْلاهُ فُنُون !!











تامنة عجايب الدنيا

صباحات الله
بى خيرها
وصباحك أحلى ما فى الكون..
يا الوهج
البقيد صباحى
فى أعماقى نار وشجون...
يا تامنة
عجايب الدنيا
يا اللا كان ولا حيكون ..!!

يا الحُسْن
البِغازِل روحُو
يا مِحْور مدار الكون....
ترتاح روحى
و أتنفس
على هدب الطريف مفتون...
واشتاق للشقا
واْتْشَهَّى
وعداً قاطْعَا أحلى عيون...
ما همانا
وانتى معانا
والكائن مصيره يكون ...

راجى هواكى
واترجى
و أساهر ليلى كله ظنون ...
البِجِى
من عيونك زين!!!
سعادة دنيا ولا شجون..!!!
حتى
إذا أذتنى رموشها
رضيان بالأذى وممنون...!!
لا بطلاً
بلاقى سهامها
لا صابراً بلاها بكون.....!!!

يا تامنة عجايب الدنيا
يا اللا كان ولا حيكون ..










الحب كده

لو كنت عارف الحب كده
أنا كنت حبيت من زمان...
ناس تدّى ناس الروح فدا
وناس فى الألم تلقى الأمان.!!

الحب زناد الأفئدة
وزاد النفوس عبر الزمان..
بيهو السنين مُتْجَدِّدَّة
وكم خلّد الماضى اللى كان...

وعرفت ليه آدم شِقَا
وليه حواء فَارَقَتْ الجِنان؟؟
شان يِفْرِشوا الحُب فى الأَرِض
وشان يبقى للإحساس لِسان!!!!!!!

وعرفت كيف الحب بعيش
رغم النوى وبُعْد المكان...
ويبقى الجميل فى كل جيل
حضن الوفا ونبع الآمان...

يا حب صحيح ما ليك مدى
وما هَدَّ مجدك صولجان....
بلقيس وقصة هُدْهُدَا
الجاب النبا وكسب الرهان.!!

هَوّمْت بى عهد الرشيد
ومواكب الغِيد الحِسَان...
وأصبحت مولود من جديد
لا هَمْ يكون لا حُزْنِ كان...

لو كنت عارف الحب كده
أنا كنت حبيت من زمان













رنين الايقاع

فــارع القوام المنتشي .... زاد سحره اعجاز الوشي
فيكي الاله ما خلا شي ... فيك كل شي

فيكي الجمــال بين وشيه ... وانـا بي خريفك منتشي
سـويتي للايقــاع رنـين .... واسستي لي فـن المشي

وصي النســايم وشـوشي ... زوريــنا مـرة ودردشي
زمــن المرارات همشيه ... زمـن البشـاشـات انعشيه

فيكي الهــنا فيكي الغــنا ... يا رايقة غــني وفرفشي
فيكي الفــرح صـفق دنا ... زيدي الــدلال مــا تبلشي

حــلفت قلـبك بالعــظـيم ... واصـلـينا مــا تسـتوحشي
مــا بمنع الحـذر القـدر ... ومشوارنا ساهل وبتمشي

بالجـفوة لي ما تلمحي ... انا قلبي هش ما توهوشي
كيــدي العــوازل واهرشي ... بالــريدة عشنا عرشي










إطمئني!!

اطمئنى
ما بقيف
قدام سعادتك
وما بتشوفى الشينة منى..!
وغير اريدك
ما بزيدك
مهما تخفى الريدة عنى..
وبين عنادك
والحقيقة
ضاع معاى عمر التمنى..
لا لقيت
عندك سعادتى
ولا لقيتى الدايرا منى...!!!
اطمئنى …
خايفة
من زول ذاته خايف
من هواكى الما بهنى....
ياما قلبو
على مصيرك
مهما فيك لاقى التجنى...
يوم تكون
الفرحة عندك
ببقى أول زول مهنى...
ولو بايده
تكونى ريده
وبى هواك يصدح يغنى..!!!
اطمئنى …
قلت بيك
يا حلوة افرح
حظك الظالم خذلنى..!!!
وقلت
انسى الريد عشانك
جن هواجسك لاحَقَنِّى …!!!
اطمئنى …







لما زاد الشوق عليّا

لما
زاد الشوق عليّا...
خفت
من عمرى الشوية...
جيت
وقلبى على الأمانى
المن زمن بتنادى ليا...

جيت أشوفك
واشفى روحى
من شقاها ومن عناها...
وابنى
صرح الريدة تانى
ما الزمن هدّم بناها...

جيت
أقَرِّب للمسافة
الجفاك طول مداها...
جيت اعاهدك
مادِّى ايدى
الكاتبة ليك ميثاق وفاها...!!!
السنين
من غير عيونك
خالية من طعم المودة...
طوّحت
آمالى فيها
والزمن جار واستبد....
تانى
لا فرقة بتجينا
لا زمانك غير زمانى...
والسنين
مهما تعاكس
يستحيل تفرقنا تانى










زمنا الفات

زمنا الفات
بلاش منو...
نعيش لى بكرة
لى فنو...
تعال
يا بكرة بالأفراح
صباحك يومى راجِنُّو..!!
سنين العمر نضويها
شموع
للتاهوا ما اتهنوا...
قلوبنا
دليل مجاهل الريد...
يَدِلُّوا السالكه
يَهْدَنُّوا...
زمانا سعيد
وريدنا جديد
عُمُرْنا
ونحن عايشنو..
وما بنندم
عليك ياريد
مدام الرادنا رايْدِنُّو...
شنو المانعنا
نحن نعيش !!
نَغِنِّى مع الزمان غَنُّوا...
ويحكى هوانا
نجم الليل
غناوى مع المسامرنو..
ونحلم
بى زمن ضحّاك
مصادقنا ومعاشرنو..!!
إذا اتبادلنا
حلو الريد
شنو الفى الدنيا دايرنو !؟










مراجيح الهموم

عارفة انتى …
وما بتخافى..
وبكرة
شاباى لى عيونك
وليكى تتجارى القوافى..
عارفة انتى … وما بتخافى..

عارفة
بلقى كلام عيونك
فى عناقيد القوافى..
وفى
خواطر طفلة تشتل
من طموح جيلها الفيافى..
وفى دروب
تايه مدارن
صوّبن نحو المرافى..
عارفة انتى … وما بتخافى..

يا الكلامك
سر هيامك
رغم عهدك واعترافى..
يا البغتّى
الليل جناحك
يا ندى الصبح الهتافى..
انتى
لا واصلنى وصلك
لا زمانك لى موافى..
عارفة انتى … وما بتخافى..

يا مراجيح الهموم
يا العندك الاحزان تصافى..
انتى
يا العافية البتسند
همة الشقيان وحافى..
وانتى
ياالطيبة البتدى
خيرك السابق خرافى..

عارفة انتى … وما بتخافى..
وريدة زيك تانى مافى!!












قنديل الأمل

عندك ضحكة يا ساتر
محت وجع السنين الفات
كست توب الفرح غنيات
بصابح بيها يوم باكر..
***
عشمت.. وما أظنك يوم..
بتكسر للعشم خاطر
أعيش طعم الحياة و ألقاك..
سماك سايق الفرح ماطر
***
زمن مستني طلاتك..
تعال في الحلوة لي شاطر
رنين الضحكة و الكلمات..
بشاير جايلة في الخاطر
***
أباري صدى الرنين بشويش
عساه يودي لي آخر
و ينقطع الأثر مني..
و شريط الذكرى بيك زاخر
***
أفتش و الأمل قنديل..
"غميد" العين مني الساهر
عوايدك و ديمة ليك تبرير..
و في نسج العذر ماهر!!!

وعند ضحكة يا ساتر!!!









عفو الخاطر

ما عارفين
البينَّا محبة
لهفة و شوق .. أم هيبة ورهبة؟؟
لا بِنْسَتِرْ
الحـال قِـدَّامَك
لا فى صغيـرة .. عـليك تتخـبّا!!!

لو فى بالك
عفو الخاطر
طيفنـا العـابر .. جـاك مـا غَبَّ..
اسأله
يحكى الوَلَهْ البينَّا
وكـيف الـريد ... جُـوَّانـا اْتْرَبَّا!!!

لو جَرَّبْتَ
الشوق زى شوقنا
كـنت فَـرَدْتَ جنــاحك و جِيتْنَا ..
لو قاسيت
زى ما قاسينا
كـنت سَليتْ النــاس و هـويتنا..
لو حسيّت
كيف عالية مكانتك
كـنت تـركت النــاس و رجـيتنا..
و لو لى لحظة
عِرَفْتَ غلاوتك
زى مـا نْعِـزَّكْ .. كـان عَـزِّيتْنا..

كُلْما اْتْناسَى
وأقول أتْرَوَّى
يجيبنى الشوق لى شخصك واهوى..
أقول اتناسى
الحاجة البينا
أجيـك مشدود.. بالأعنف و أقوى..!
أقول أتناسى
شجونى فْ بُعْدَكْ
الاقى هــواك .. الشفـا والسلوى..!
واقول أتفادى
الفَاتِكْ طَرْفَكْ
ألاقي عـيونك ... أجمـل مـأوى..!!

وما عارفين!!!










موقف

لا بجيك
لا بستجير..
لا مفاتيح عمرى
عندك
لا هواك آخر المصير...

ياما
فى الفات من عُمُرْنا
هِمْتَ بيك الليل وجاوَزْتَ المدى..
و صِحْتَ
يوم لاقيت عيونك
عمـرى يـادوب مـا بـدا...
والغنا
الفى الريد كتبتو
ليـهو فى الأيـام صـدى...
واصطفيتك
ريد ودنيا
وكان هـواك مرسى وهدى...
والمشاوير
ليك مشيتها
لا اشتكيت
بُعْد المسافة ولا متاهات الردى...

وانت طبعك
ياهو طبعك
لا سِخَتْ بالـريد عيونك
لا هى أَوْفَـتْ مـوعـدها...
والزمن
عَصَّاك علينا
وْ فَتَّحْ آلاف المواجع و جَدَّدَها..
و الفرح
ألوانه باهتة
و ضـاع مع الآمـال سُـدَى ..
و لِسَّه داير
مِنِّى أكتر
أعمل ايه بالله اكتر من كده ؟؟











زاد السفر

كان العشم
تبقى المقر
لى زول حياتو شقا وسفر..
غرّب شقى
و غاب ما لقى
قَبّل حِفا وبَحّر فتر ..
كان عشمو
تبقى المستقر
يا البسمتك زاد السفر...

فى ليلة
سهران والقمر
لما السهر غلبو السهر...
خلانى
للغربة ونفر
فى ظلمة الليل الفتر...
بان طيفك ..
الهاش البشوش
فى عتمة الأحزان حضر...
ضاحك
يقالد غربتى
منّانى بالخير والبُشر...

بى لهفة
المشتاق إليك
لا رهبة لا خوف لا حذر..
سارعت
بالأحضان
أسابق شوقى للطيف الحضر..
لكنه ضاع
من غير وداع
اتلاشى لا حس لا خبر....
وأنا حضنى
مفتوح للوهم
حتى الوهم فات ما صبر..

مع انى عارف
من زمن
مكتوب على أشقى الدهر..
لا أهنا يوم
لا القى نوم
لا يوم يصافينى القدر...
الزيّى أبداً
ما بتوب
طول عمره يحلم بالقمر..!!
كان عشمه
تبقى المستقر
يا البسمتك زاد السفر...!









بوابة الهوى

كل المداخل
لى هواك جربتها
تواهة
بوابة هواك
يوم ما هدت لى منتهى..

جاييكى
بحلم بالمنى
وبى دنيا يمتد سعدها..
وبى ضحكة
من قلب الحزن
تنشلنى قدرة يدها..
ولقيتك ..
انتى على الطريق
أحزان يتوّه حدها..

يلاكى
يا حلم العمر
يا غنوة بعشق سردها..
يا برعم
الأمل الجميل
فى دنيا ذابل وردها..
أحمينى
من نار السنين
كونى سلامها وبردها..!!

ما تقولى لى
فات الأوان
العمر لسع ما انتهى..
وما تقولى لى
أصبر كمان
حبل الصبر جف و وهى..
و ايه كان
بيحصل يا زمان
لو كل زول لقى مشتهى؟؟؟

ايدك
على ايد الزمن
صخرة شقانا نهدها..
وخليكى
أقوى من الظروف
لازم نوقف مدها...
وضمينى
لى حضن الأمان
من عاصفة يصعب صدها..

واحمينى
من نار السنين
كونى سلامها وبردها..
من روائع الشاعر احمد فرح شادول 31092_1347445499573_1634393937_805677_1144994_s


عدل سابقا من قبل المابجاغم في الإثنين 7 فبراير 2011 - 2:18 عدل 1 مرات
الرجوع الى أعلى الصفحة اذهب الى الأسفل
https://homor.sudanforums.net
عبدالله بله

عبدالله بله


عدد المساهمات : 86
نقاط : 208
السٌّمعَة : 22
تاريخ التسجيل : 02/01/2011
العمر : 37

من روائع الشاعر احمد فرح شادول Empty
مُساهمةموضوع: رد: من روائع الشاعر احمد فرح شادول   من روائع الشاعر احمد فرح شادول I_icon_minitimeالخميس 6 يناير 2011 - 21:07

جميل والله كلمات رائعه تشكر يازوووووووووووووووووووق
الرجوع الى أعلى الصفحة اذهب الى الأسفل
https://homor.sudanforums.net
 
من روائع الشاعر احمد فرح شادول
الرجوع الى أعلى الصفحة 
صفحة 1 من اصل 1
 مواضيع مماثلة
-
» شادول. الحب كده
» شادول .اماني الدنيا
» مرحب بشير احمد كرار

صلاحيات هذا المنتدى:لاتستطيع الرد على المواضيع في هذا المنتدى
شباب حمدت الله {الحمر} :: المنتديات :: الشعر والادب-
انتقل الى: